33000.lk

Wednesday, February 25, 2015

Written on

වීරවංශ සංධානෙට නෑ


විමල් වීරවංශ මහතාගේ ජාතික නිදහස් පෙරමුණ එක්සත් ජනතා නිදහස් සන්ධානයේ හවුල්කාර පක්ෂයක් නොවන බවත්, ඔවුන් කරන්නේ ඡන්දයක් ආවාම අපෙන් ටිකට් එක ඉල්ලගෙන තරඟ කරන එක යයි විපක්ෂ නායක නිමල් සිරිපාල ද සිල්වා මහතා පවසයි.

සුසින් ප්‍රේමජයන්ත සන්ධානයේ ලේකම්වරයා මේ බව පැහැදිලිව කියා ඇති බවත් සඳහන් කළ විපක්ෂ නායක සිල්වා මහතා නුගේගොඩ පැවැති රැස්වීම පිළිබඳව සඳහන් කරමින් අපේ පක්ෂය වැඩ කටයුතු කරන ආකාරය ගැන කියා දීමට වෙනත් පක්ෂවලට තිබෙන අයිතිය කුමක්දැයි විමසා සිටියේය.

නුගේගොඩ රැස්වීමට සහභාගී වන ලෙස ශ්‍රී ලංකා නිදහස් පක්ෂයට කිසිම ආරාධනාවක් නොලැබුණු බවත්, එවැනි තත්ත්වයක් යටතේ ශ්‍රීලනිප මන්ත්‍රීවරුන් රැස්වීමට සහභාගී වීම වරදක් බවට ජනාධිපතිතුමා සිය මතය ප්‍රකාශ කළ බවත් කීය.

මෙවැනි ක්‍රියා මගින් ඔවුන් උත්සාහ කරන්නේ ශ්‍රීලනිපය දෙකඩ කිරීම හා තමන්ගේ මනාප ඡන්ද ප්‍රමාණය කඩා ගැනීමට බවත් කී විපක්ෂ නායකවරයා නව ව්‍යවස්ථාව යටතේ කොට්ඨාශ ඡන්ද ක්‍රමය පැමිණි පසු ඔවුන්ගේ බලාපොරොත්තු කඩ වී යනු ඇතැයි ද කීවේය.

චන්ද්‍රිකා බණ්ඩාරනායක මහත්මිය තම සොයුරාටවත් අගමැති පදවිය නොදී මහින්ද රාජපක්ෂ මහතාට අගමැති පදවිය ලබා දී දෙවන පෙළ නායකත්වයක් හදා පළමු පෙළට ගෙන ආ බවත්, තමන්ටත් අගමැති වීමට අවශ්‍ය සුදුසුකම් සහ කැපවීම දැනටත් තිබෙන බවත් සිරිපාල මහතා පැවසීය. 
Written on

CSN අත් හැර දමයි. සේවකයන්ට වන්දි

CSN රූපවාහිනිය මාර්තු මස 01දා සිට වසා දැමීමට එහි පාලනාධිකාරිය තීරණය කර ඇතැයි වාර්තාවේ. ඒ අනුව මේවන විට සේවකයන් 30 දෙනෙකුට වන්දී ලබා දී අයතනයෙන් ඉවත් කිරීමද සිදුව තිබේ.
ඉතිරි ඉතිරි සේවකයන් කිහිප දෙනා ඊයේ සිට නිවාඩු යවා ඇත. පසුව එම ආයතනය විසින් පවත්වාගෙන යන සිංහ එෆ් එම් රේඩියෝවට සම්බන්ධ කරගැනීමට නියමිතය.
එම රූපවාහිනී සේවය ගොඩ නැගීම සඳහා රාජ්‍ය දේපල යොද ගත් බවටද චෝදනා එල්ල වී තිබුණු අතර පසුගිය කාලයෙහි රජයට ගෙවිය යුතු බදු මුදල් කිසිවක් ගෙවීමටද කටයුතු කර තිබුණේ නැත. මේ හේතුවෙන් පසුගිය අයවැයෙන් රුපියල් මිලියන දහසක බදු මුදලක් ගෙවිය යුතු බවටද නියම විය. ඒ අනුව එම බදු මුදල් නොගෙවා ආයතනයේ අයිතිය අත් හැරීමට එම හිමිකරුවන් වන රජපක්ෂ පවුල තීරණය කර ඇති බව අප විසින් මීට පෙර වාර්තා කළෙමු.
CSN රූපවාහිනියේ ඇතැම් නිලධාරීන්ට පසුගිය සමයේ වේතන ලබාදෙන ලද්දේ ජනාධිපති කාර්යාලය විසිනි. එසේම ජනාධිපති කාර්යාලයට අනුයුක්ත වාහන ‍රැසක් CSN රූපවහිනියේ ඉහල නිලධාරීන්ගේ භාවිතය වෙනුවෙන් සපයා දී තිබිණි.
Written on

වීරවංශ අත් අඩංගුවට ගැනීමට නියමිතයි

හිටපු අමාත්‍ය විමල් වීරවංශ මහතාගේ බිරිඳ වන ශෂී වීරවංශ මහත්මිය එළැඹෙන 25දා දක්වා රිමාන්ඩ් බාරයට පත්කිරීම කඩුවෙල මහේස්ත්‍රාත් අධිකරණය ඊයේ (23දා) නියෝග කළේය.

ඇය ප්‍රතිකාර ලබන මාළඹේ පෞද්ගලික රෝහලට ගිය මහේස්ත්‍රාත්වරයා ඇය රෝහලේම බන්ධනාගාර නිලධාරීන් බාරයට පත්කළේය.

හිටපු ඇමැති විමල් වීරවංශ මහතා සිය දරු දෙදෙනාගේ උප්පැන්න සහතිකවල ද බිරියගේ හා තමාගේ උපන්දිනය හ නම වෙනස් කර ඇති බවට තොරතුරු අනාවරණය වී ඇතැයි රහස් පොලීසිය ඊයේ (23) කොළඹ ප්‍රධාන මහේස්ත්‍රාත් ගිහාන් පිලපිටිය මහතා හමුවේ දැනුම් දුන්නේය‍.

මේ අනුව ඉදිරියේදි ව්‍යාජ ලේඛන සැකසීමේ චෝදනාව යටතේ විමල් වීරවංශ මහතාවද අත් අඩංගුවට ගැනීමට සිදුවනු ඇතැයි පොලිස් ආරංචි මාර්ග සඳහන් කරයි


2008.12.10 වන දින මේ වෙනස් කිරීම් සිදු කර ඇති අතර වීරවංශ මහතාගේ උපන්දිනය 1965.03.07 - 1970. 03.07 ලෙසත් බිරියගේ උපන්දිනය 1967.02.01 – 1971.02.01 හා ගිර්ජා උදයන්ති යන නම ශෙහාරා උදයන්ති ලෙසට දරුවන්ගේ උප්පැන්නවල සංශෝධන කර ඇත.

ව්‍යාජ තොරතුරු ආගමන විගමන දෙපාර්තමේන්තුව වෙත ඉදිරිපත් කර අවිධිමත් ගමන් බලපත්‍රයක් ලබා ගැනීම හා ගමන් බලපත්‍ර දෙකක් භාවිත කිරීමේ චෝදනාව සැකකාරියට එරෙහිව රහස් පොලිසිය ගොනු කර තිබිණි.

ව්‍යාජ ගමන් බලපත්‍රය රාජ්‍ය තාන්ත්‍රික බලපත්‍රයක් වන බැවින් ඒ සඳහා එවකට ඉදිකිරීම් ඉංජිනේරු සේවා හා නිවාස පහසුකම් ඇමැති විමල් වීරවංශ මහතාගේ අත්සනින් යුතු ලිපියකට 2010.09.13 වන දින ආගමන විගමන පාලක ජනරාල් චූලානන්ද පෙරේරා මහතා ගමන් බලපත්‍රය නිකුත් කර ඇති බවට අධිකරණයෙන් කරුණු අනාවරණය විය.

මේ බලපත්‍රය ලබා ගැනීමේදී පෙර ගමන් බලපත්‍රය පිළිබඳ තොරතුරු දෙපාර්තමේන්තු වෙත වසන් කර ඇති බවත් එම බලපත්‍රය විනාශ කර ඇති බව ද තොරතුරු ආගමන විගමන දෙපාර්තමේන්තුවේ පරිගණක අංශයේ ජ්‍යෙෂ්ඨ නියෝජ්‍ය පාලක නිශාන්ත අනුරුද්ධ මහතා රහස් පොලිසිය වෙත ප්‍රකාශ කර සඳහන් කර තිබිණි.

ජාතික හැඳුනුම්පත් අංක 675320233 V උපන් දිනය 1967.02.01 උපත ලෙස සඳහන් රණසිංහ මුදියන්සේලාගේ ගිර්ජා උදයන්ති ලෙසත් ජාතික හැඳුනුම්පත් අංක 715344696 V උපන් දිනය 1971.02.03 රණසිංහ මුදියන්සේලාගේ ෂෙහාරා උදයන්ති ලෙස 2010.04.13 නිකුත් කර ඇති බව පවසන ජාතික හැඳුනුම්පත් දෙපාර්තමේන්තුව 2015.01.23 දෙපාර්තමේන්තු සහකාර කොමසාරිස්වරිය පවසා ඇත්තේ හැඳුනුම්පත්වල මුල් ගොනු විනාශ වී ඇති බවය.

මේ සම්බන්ධයෙන් මධ්‍යම ලේඛනාගාරයේ ගොනු පරීක්ෂා කළ බව පවසන රහස් පොලිසිය දරුවන්ගේ උප්පැන්න සහතිකවල පියාගේ උපන්දිනය, මවගේ නම හා උපන්දිනය සංශෝධනය කර ඇති බවට ලේඛන සොයා ගත් බව පැවසීය.

1997 ඉඹුල්ගොඩ ප්‍රදේශයේ පදිංචිය අතහැර ගිය බවට ඉඹුල්ගොඩ ග්‍රාමනිලධාරීවරයා ද 2008 සිට මේ දක්වා ජාතික හැඳුනුම්පත් ලබා ගැනීමට සහතික තමා නොදුන් බවට තිඹිරිගස්යාය ග්‍රාමසේවා නිලධාරිවරයා ද රහස් පොලිසියට ප්‍රකාශ ලබා දී තිබිණ.

තවද (සැකකාරියගේ) 5935 දරන උප්පැන්න සහතිකය ව්‍යාජ උප්පැන්න සහතිකයක් බවට කොළොන්නාව අතිරේක දිස්ත්‍රික් රෙජිස්ටාර්වරිය ප්‍රකාශ ලබා දී තිබේ.

මීට අමතරව සැකකාරිය ඉගෙනුම ලැබූ ගම්පහ මිරිස්වත්ත විද්‍යාලයේ හිටපු විදුහල්පතිවරයා ද ඇයගේ උපන්දිනය 1967/2/1 බවට විදුහලට ලද ලේඛන අනුව ප්‍රකාශ ලබා දී තිබිණ.

වීරවංශ මහතාගේ පළමු දරුවා විභූති විශ්වජිත් වීරවංශ හා දෙවන දරුවා විමාශා විශ්වාදරී වීරවංශ උප්පැන්න සහතිකවල පියාගේ උපන්දිනය ලෙස 1965/3/7 - 1970/3/7 ලෙස සංශෝධනය කර ඇති බවත් මවගේ උපන්දිනය 1967/2/1 - 1971/2/3 ලෙස නම ශිර්ජා උදයන්ති ෂෙහාරා උදයන්ති ලෙස නාමය 2008/12/10 වෙනස් කර ඇති බවට රහස් පොලිසිය අධිකරණයට කරුණු දැක්වීය.

දරුවන්ගේ උප්පැන්නේ මවගේ හා පියාගේ උපන් දිනය නම වෙනස් කිරීමට වීරවංශ මහතාගේ නියෝගයකට අනුව බිරිය මධ්‍යම ලේඛනාගාරයේ සහකාර රෙජිස්ටාර් ජනරාල් එච්. සුමතිපාල හෙට්ටිආරච්චි මහතා හමුව ඇති බවට ද කරුණු අනාවරණය වූයේ යැයි පොලිසිය අධිකරණයට පැවසීය.

නො 233/16 රත්නායක මාවත, දකුණු තලංගම, බත්තරමුල්ල පදිංචි හේවාපතිරණගේ චමින්ද පෙරේරා විසින් ඉකුත් ජනවාරි 23වන දින රහස් පොලිසිය වෙත මෙම පැමිණිල්ල ඉදිරිපත් කොට ඇත.

නිවාස හා නාගරික සංවර්ධන අමාත්‍යවරයාව සිටි විමල් වීරවංශ මහතාගේ බිරිය වන රණසිංහ රන්දුණු මුදියන්සේලාගේ ශිර්ජා උදයන්ති නොහොත් ශෂී වීරවංශ මහත්මිය ආගමන විගමන පාලකවරයාගේ හෝ බලයලත් නිලධාරියෙකු වෙත අසත්‍ය තොරතුරු ඉදිරිපත් කර අවිධිමත් විදේශ ගමන් බලපත්‍රයක් සකස් කර ගෙන ඇති බවට පැමිණිල්ලේ සඳහන් ය.

ඇය විසින් එන් 1284124 ගමන් බලපත්‍රය ජාතික හැඳුනුම්පත් අංක 675320233v ලබාගෙන ඇති අතර ඩී. 3642817 දරන විදේශ ගමන් බලපත්‍රය ජාතික හැඳුනුම්පත් අංක 715344696v ලබාගෙන ඇති බවට කරුණු අනාවරණය වී තිබේ.

පෙබරවාරි හය වන දින අයි ඇන්.ඩී.ඊ 14/15 යටතේ උධෘත නීතිපතිවරයා වෙත ගොනු කළ බව කියන රහස් පොලිසිය නීතිපති උපදෙස් අනුව ඇයගේ ප්‍රකාශ ලබා ගන්නට අවසර ලබා දී තිබූ බැවින් ඇයට ඒ බව බත්තරමුල්ල, ජයන්තිපුර හා පන්නිපිටිය පොල්වත්ත ලිපිනයන්ට දුරකථන ඇමතුම් ලබා දුන් බවට පොලිසිය අධිකරණය හමුවේ පැවසීය.

පසුව ඉකුත් 21වන දින ඇය මාලඹේ නෙවිල් ප්‍රනාන්දු පුද්ගලික රෝහලේ නේවාසිකව ප්‍රතිකාර ලබන බවට නීතිඥයෙකු මාර්ගයෙන් රහස් පොලිසිය වෙත දැනුම් දුන් බවත් රහස් පොලිසියට කැඳවන බව දැනුවත් ව සිටිය දී ඇය රෝහල්ගතව ඇතැයි පොලිසිය අධිකරණය හමුවේ පැවසීය.

නේවාසික ප්‍රතිකාර ලබන ඇය කොළඹ අධිකරණ වෛද්‍ය නිලධාරී ඒ. ඉලගවන් මහතා පරීක්ෂාවට ලක් කොට සැකකාරිය අත්අඩංගුවට ගැනීමට හෝ ප්‍රශ්න කිරීමට සුදුසු ශාරීරික යෝග්‍යතාවයෙන් සිටින බවට දැනුම් දීමෙන් අනතුරුව ඇය 429 කාමරය තුළ දී අත්අඩංගුවට ගත් බවට රහස් පොලිසිය අධිකරණය හමුවේ පවසා සිටියේය.

1993 අංක 16 1998 අංක 42 2006 අංක 3 පනතේ සංශෝධිත 351 අධිකාරියේ වූ ආගමික විගාමික පනතේ 45 (1) අ, ඇ. ඊ. ඕ. හා ද.නි.ස 453 කියැවෙන 454 459 වගන්ති යටතේ දඬුවම් ලැබිය හැකි වරදවල් සැකකාරිය විසින් සිදු කර ඇති බවට රහස් පොලිසිය අධිකරණයට කරුණු වාර්තා කොට තිබිණ.

දැනට අත්අඩංගුවට ගනු ලැබූ සැකකාරිය රහස් පොලිසිය බාරයේ සිටින බව පැවසූ රහස් පොලිසිය ජාතික හැඳුණුම්පත් 675320233v 715344696v භවිතා කර බැංකු හා වෙනත් මූල්‍ය ආයතන සමඟ සැකකාරිය ගනුදෙනු සිදු කර බැංකු ගිණුම් හෝ එම හැඳුනුම්පත් භාවිතා කර බැංකු ණය ලබාගෙන ඇත්ද? යන්න සම්බන්ධයෙන් පුළුල් පරීක්ෂණයක් ආරම්භ කර ඇති බව පැවසීය.

මෙම කරුණු අනුව සැකකාරියට ඇප ලබා දීමට විරෝධය දක්වන රහස් පොලිසිය ඇයට ඇප ලබා දුන්නේ නම් සාක්කිවලට අහිතකර බලපෑම් ඇතිවිය හැකි බැවින් 1997 අංක 30 ඇප පනතේ 14 (1) අ (11) වගන්ති ප්‍රකාරව ඇප ලබා දීමට විරුද්ධ වන බව පැවසීය.

නො 74/7, මංගල මාවත, හෝකන්දර පදිංචි ශිර්ජා උදයන්ති නොහොත් ශෂී වීරවංශ නැමැති සැකකාරිය ලබන මස 9වන දින දක්වා රක්ෂිත බන්ධනාගාරගත කරන ලෙසත් නේවාසිකව ප්‍රතිකාර ලබන කාමර අංක 429 සිටින ඇය බන්ධනාගාර නිලධාරීන් බාරයට ගන්නා ලෙසට බන්ධනාගාර අධිකාරිවරයාට නියෝග නිකුත් කරන ලෙස රහස් පොලිසිය අධිකරණයෙන් ඉල්ලා තිබිණ.

Monday, February 23, 2015

Written on

විමල් CIDයට

හිටපු අමාත්‍ය විමල් වීරවංශ මහතා අපරාධ පරික්ෂණ දෙපාර්තමේන්තුවට කැඳවා තිබෙනවා. කෙසේ වෙතත් මෙම කැඳවීම කුමක් සඳහා කරන ලද්දක් දැයි පොලිස් ප‍්‍රකාශක කාර්යාලය තවමත් තහවුරු කරන්නේ නැහැ
Written on

භාරත ඝාතකයන්ට තොන්ඩුව ???

භාරත ලක්ෂමන් ප්‍රේමචන්ද්‍ර මහතා ඝාතනය කිරීම සම්බන්ධයෙන් යුක්තිය සාධාරණය ඉ‍ටුකිරීම ලබන සතියේ
දී ආරම්බවනු ඇතැයි ඔහුගේ දියණිය වන පළාත් සභා මන්ත්‍රිණී

හිරුණිකා පේමචන්ද්‍ර මෙනවිය පවසයි.
ඇය පෙන්වා දෙන්නේ මේ වෙනුවෙන් පෙර රජයෙන් පිටතට ආ විට මරණ තර්ජන මැද වුවත්, තමන් ඇතුළු පිරිස කටයුතු කළ බවයි.
"අපි ජයග්‍රහණය කරයිද නැද්දයන්න පවා අපි දැනගෙන හිටියේ නැහැ. නමුත් ජනාධිපති මෛත්‍රීපාල සිරිසේන මහතා සහ රාජිත සේනාරත්න මහතා අපි ළඟ සිටියා. අප කෙරෙහි විශ්වාසය තබා අප සඳහා ඡන්දය දෙන්න කියලා මිනිස්සුන්ට කීවා".

"අද ප්‍රශ්නය වෙලා තියෙන්නේ මේ ආණ්ඩුව තවමත් ජනතාවට විනකරන අය තවමත් අත් අඩංගුවට ගෙන නොමැති වීමයි. එහෙත් ඇත්තටම, යහපාලනය හා නියමිත ක්‍රියා පටිපාටිය අනුගමනය කිරීමට කාලය දිය යුතුයි.

අපරාධ, විශේෂයෙන් මිනීමැරුම්, ස්ත්‍රී දූෂණ ආදියට එරෙහිව සටන් කිරීම සඳහා අපගේ පරිශ්‍රමය යෙදිය යුතුයි එමෙන්ම ඒ ක්‍රියාවලිය විනිවිද පෙනිය යුතුයි.සාමාන්‍ය පුද්ගලයින් මෙය තේරුම් ගැනීම කළ යුතු යි."
Written on

නිදහස්දා ලේ විලක් කරන්න බැරිවෙයි

පසුගිය සතියේ ජාතික එකාබද්ධ රජයේ වැඩි අවධානයට ලක්ව තිබුණේ ගෙවුනු පෙබරවාරි මස 4 වැනිදා ශ‍්‍රීජයවර්ධනපුර කෝට්ටේහි පාර්ලිමෙන්තු සංකීර්ණය අසල  පැවැත්වුනු නිදහස් දින සමරුවට සහභාගීව සිටි ජනාධිපතිවරයාට හා අනෙකුත් සම්භාවනීය අමුත්තන්ට එල්ල කිරීමට සැළසුම් කර තිබී ඇතැයි කියන ප‍්‍රහාරයක්  පිළිබඳවය.එම ප‍්‍රහාරය 1981 වසරේදී ඊජිප්තු ජනපති අන්වර් සදාත් ඝාතනය කෙරුණු පරිද්දෙන් දියත් කිරීමට තිබුණු බව සදහන් වන අතර එම ප‍්‍රහාරයේදී ආරක්ෂක රථ පෙළපාලියකට සහභාගීව සිටි ආරක්ෂක අංශ සාමාජිකයෝ කණ්ඩායමක් තම රථ වලින් බැසවිත් ජනාධිපතිවරයා ඇතුළු අමුත්තන්ට වෙඩි තබා ඔවුන් ඝාතනය කළහ.

බුද්ධි අංශ වලින් මෙම තොරතුරු ලබාගත් වහාම කි‍්‍රයාත්මකව ඇති ආරක්ෂක ලේකම් බී.එම්.යූ.ඞී බස්නායක මහතා ජනපතිවරයාව දැනුම්වත් කිරීමටත්,එසේ ප‍්‍රහාරයක් එල්ලවුවහොත් එය මර්දනය කිරීමට ගතයුතු පියවර ගැන සාකච්ඡා කිරීමට ආරක්ෂක විශේෂඥයින් හා රැස්වීම් වට කිහිපයක්ම පැවැත්වීමටත් කටයුතු කර ඇත.

ප‍්‍රහාරයෙන් ආරක්ෂා වෙන්න කළ යුතු දේ ගැන එම රැස්වීම් වලදී දීර්ඝව සාකච්ඡා කෙරුණා යැයි මේ සම්බන්ධයෙන් අදහස් දැක්වූ රජයේ ආරංචි මාර්ගයක් පැවසීය.කෙසේවෙතත් ලැබුණු අනතුරු ඇගවීමේ,ප‍්‍රහාරයෙන් ඉලක්ක කෙරෙන්නේ කවර  පුද්ගලයින්ද,ප‍්‍රහාරය සැළසුම් කර ඇත්තේ කවුරුන්ද ආදී වැදගත් තොරතුරු කිසිවක් සදහන්ව නොතිබුනි.ප‍්‍රහාරය ගැන ලද තොරතුරු විශ්වාස කළ හැකි මට්ටමක තිබුණු බව පැවසීමට අමතරව ඒ සම්බන්ධ වැඩි තොරතුරක් පෙර සදහන් කළ රජයේ ආරංචි මාර්ගය හෙළි නොකළේය.

එම තොරතුරු ලැබුණු දිනයේ පටන් නිදහස් දින උළෙලේදී ආරක්ෂක කටයුතු දියත් කළ යුත්තේ කෙසේදැයි ආරක්ෂ විශේෂඥයින් සැළසුම් කරමින් සිටියද ඔවුන්ගේ වැඩකටයුතු  සිතුවාට වඩා පහසුවන බවක් පෙනෙන්නට තිබුණේ ජනපති සිරිසේන 67 වැනි නිදහස් දින සමරුව වැඩි සංදර්ශනයක් නොමැතවි ඉතා චාම් හා සරලව පැවැත්වීමට තීරණයක් ගෙන තිබුණු හෙයින්ය.ආරක්ෂක අංශ සතු අවි බලය ප‍්‍රදර්ශනය කිරීම හා සමරුවට ඉහළින් ගුවන්හමුදාවට අයත් ප‍්‍රහාරක යානා පියාසර කරවීම අනවශ්‍ය යැයි ජනපතිවරයාගේ තීරණය විය.එමෙන්ම උත්සවයේ කටයුතු සදහා පාසැල් ළමුන් සියගණන් සහභාගී කරගැනීමටද ඔහු විරෝධය දැක්වීය.පසුගිය රජය මෙවර නිදහස් සමරුව පැවැත්වීමට සැළසුම් කර තිබුණේ රාජපක්ෂ ් ජන්ම භූමිය වන වීරකැටියේදීය.එම සැළසුම් වෙනස් කොට සමරුව පැවැත්විය යුත්තේ කොළඹ යැයි  තීරණය කළේ නව ජනපතිවරයාය.



දිනය 1987 ඔක්තෝබර් මස 17 වැනිදාය.ඊජිප්තු ආරක්ෂක අංශ 1973 වසරේ දියත් කළ බදාර් මෙහෙයුම අනුස්මරණය කෙරෙන වාර්ෂික සැමරුම යෙදී තිබුණේ එදිනටය.යොම් කිප්පු යුද සමයේදී සූවස් ඇළ තරණය කර ඊශ‍්‍රායෙලය නොසිතූ අවස්ථාවක ඔවුන්ට ප‍්‍රහාරයක් එල්ල කළ ඊජිප්තු ආරක්ෂක අංශ සීනායි අර්ධද්වීපය අත්පත් කරගත්හ.මෙය හැදින්වුනේ බදාර් මෙහෙයුම ලෙසය.නමුත් ඇමරිකාව ඊශ‍්‍රායෙලයට ගුවනින් අවි හෙළීම නිසා සටන නැවතත් ඊශ‍්‍රායෙලයට වාසි සහගත වුනි.අවසානයේ ගැටුම් වලට විරාමයක් තබමින් ඊජිප්තු ජනපති සදාත් ඊශ‍්‍රායෙලය හා ගිවිසුමකට එළැඹියේය.මෙය සදාත්ගේ පෞද්ගලික ජයග‍්‍රහණයක් ලෙස සැළකෙන්නකි.වසර ගණනක් මෙම ජයග‍්‍රහණය සමරා අනතුරුව එළඹුනු එම දෛවෝපගත දිනයේදී සදාත් සිටියේ කයිරෝ අහසින් ඉහළට නැගෙන ප‍්‍රංශයේ නිශ්පාදිත මිරාජ් ජෙට් යානා සමූහයක් දෙ නෙත් යොමාගෙනය.එය නරඹමින් සිටි අතරේ ඔහු සිටි පීඨයට ඉදිරියන් ගමන් කරමින් තිබූ හමුදා රථයකින් භට පිරිසක් එළියට පැන්නෝය.අවි අමෝරාගෙන ජනපතිවරයා රැුදී සිටි පීඨය වෙත දිවගිය ඔවුහු ජනපතිවරයාවත්,අමුත්තන්වත්  වෙඩි වරුසාවකින් නහවා අත්බෝම්බ කිහිපයක්ද එල්ල කළෝය.බරපතල තුවාළ ලබා සිටියද ජීවතුන් අතර සිටි ජනපති අසාද් වහ වහා රෝහල වෙත ගෙනගියද එම යන අතරමගදී ඔහු මියගියේය.

සේනාධිනායකයා ලෙසත් ආරක්ෂක අමාත්‍යවරයා ලෙසත් බලතල හිමි ජනපති සිරිසේන ගෙවුණු සතියේ ආරක්ෂක අංශ වල මුල් පෙළ තනතුරු වලට නව පත්කිරීම් සිදුකිරීම ගැන තම අවධානය යොමු කළේය.ඔහුගේ පළමු පියවර වූයේ නව හමුදාපතිවරයෙකු පත්කිරීමයි.නව දිල්ලියේ සිට පැමිණ දින දෙකක් ගතවීමේදී නව හමුදාපතිවරයෙකු නම් කිරීමට ජනපති සිරිසේන සමත්වූවේය.තනතුර සදහා කවරෙකු තෝරාගත යුතුදැයි නව  රජයේ ඇමතිවරුන්ගෙන්ද විශේෂයෙන් තිස් වසරක සිවිල් යුද්ධය ජයග‍්‍රහණය කරා ගෙන ගිය හිටපු හමුදාපති හා දැන් ප‍්‍රජාතන්ත‍්‍රවාදී පක්ෂයේ නායක සරත් ෆොන්සේකා මහතාගෙන්ද ඔහු විමසීය.එම සියලූදෙනාගේ අදහස්ද සැළකිල්ලට ගත් ජනපතිවරයා අවසානයේ තීරණයක් ගත්තේය.ඒ අනුව යුධ හමුදාවේ සිටින ජ්‍යෙෂ්ඨතම නිලධාරියා වන මේජර් ජෙනරාල් කි‍්‍රෂාන්ත ද සිල්වා නව හමුදාපතිවරයා ලෙස පත්කරනු ලැබුණි.කොළඹ රාජකීය විද්‍යාලයේ ආදි ශිෂ්‍යයෙකු වන ඔහුට හමුදාවේ ජ්‍යෙෂ්ඨතම නිලධාරියා හෙයින් හමුදාපති තනතුර ලබාදිය යුතුව තිබුණද පසුගිය රාජපක්ෂ රජය එය මගහැර රුසියාවේ ශී‍්‍රලංකා තානාපති කාර්යාලයේ නියෝජ්‍ය තානාපතිවරලා ලෙස සේවය කිරීමට ඔහු එරටට යවා තිබුණි.වර්තමානයේ හමුදාපති තනතුර හොබවන්නේ ලූතිනන් ජෙනරාල් දයා රත්නායකය.ආරක්ෂක අංශයන්හි මුල්පෙල තනතුරු වල නව පත්කිරීම්ද ඉතාම ඉක්මනින් සිදුවනු ඇත.

නව හමුදාපති නම් කිරීම සිදුවන විට හමුදාවේ ඇතැම් තනතුරු වලට නව පත්කිරීම් සිදුකරද අවසානය.පසුගිය 16 වැනිදා සිට ලබාදුන් මෙම නව පත්වීම් අතර සිටින බහුතරය සරත් ෆොන්සේකා මහතා ඉතාම සමීපව ඇසුරු කළ පුද්ගලයින් වීම විශේෂයකි.ඔවුන් අතරින් ප‍්‍රධාන වන්නේ වන්නි කලාපයේ නව ආඥාපති ලෙස  පත්කර සිටින මේජර් ජෙනරාල් අමල් කරුණාසේකරය.බුද්ධි අංශ ප‍්‍රධානියා ලෙස පත්කර සිටි ඔහුව පසුගිය රජයේ අණින් ඊජිප්තුව වෙත යවා තිබුණි.එරට සිට අප‍්‍රිකා මහද්වීපයේ අන්තයේ පිිහිටන රටක් වන එරිති‍්‍රයාවේ කටයුතු නිරීක්ෂණය කිරීම ඔහුගේ වගකීම  විය.මෙසේ එක් රටක සිට තවත් රටක් ගැන ඇස ගසා සිටීමට ඔහුට සිදුව  තිබුණේ එරිති‍්‍රයාව හා රාජ්‍ය තාන්ති‍්‍රක සබදතා ඇතිකරගැනීමේ වුවමනාව ශී‍්‍රලංකා රජයට තිබුණද  කොටි සාමාජිකයින්ගේ සහය ලබන බව කියන එරිති‍්‍රයා පාලනය හිමි අස්මාරා රජය එනිසාදෝ ශී‍්‍රලංකාවේ නිළධරයෙක් තම රටට පිළිගැනීම ප‍්‍රතික්ෂේප කළ නිසාය.2009 වසරේදී තමන් ජනපති අපේක්ෂකයෙකු ලෙස ඉදිරිපත්වනවා යැයි සරත් ෆොන්සේකා මහතා නිවේදනය කළ විට මේජර් ජෙනරාල් අමල් කරුණාසේකර සොයා පැමිණි රහස් පොලිසිය සරත් ෆොන්සේකා මහතා සම්බන්ධයෙන් දියත් කිරීමට යන පරීක්ෂණ කටයුතු වලට ඔහුගේ සහය ඉල්ලා සිටියේය.එම ඉල්ලීම් සියල්ල තරයේ ප‍්‍රතික්ෂේප කිරීමට මේජර් ජෙනරාල් කරුණාරත්න කටයුතු කළේය.නව පත්වීම් ලැබූ අනෙකුත් නිළධාරීන්  අතර යුධ හමුදා ලේකම් ලෙස පත්ව සිටින මේජර් ජෙනරාල් මහේෂ් සේනානායක හා මෙහෙයුම් අධ්‍යක්ෂක ලෙස පත්කර සිටින බි‍්‍රගේඩියර් ඞී.සී.කැප්පෙටිවලාන ආදීහු ප‍්‍රධානය.මෙම නිළධරයින් දෙදෙනාත් නව පත්වීම් ලැබූ අනෙක් මේජර් ජෙනරාල්වරුන්  සිව්දෙනා,බි‍්‍රගේඩියර්වරුන් සිව්දෙනා,කර්නල්වරයා,ලූතිනන් කර්නල්වරයා හා කපිතන්වරු  දෙදෙනා ඇතුලූ 14 දෙනා හිටපු රාජපක්ෂ රජයේ නියමයෙන් විශ‍්‍රාම යවා තිබුණු පුද්ගලයින් වීම විශේෂය.ඉතිහාසයේ කිසිදු අවස්ථාවක නොවූ අයුරින් මෙසේ මෙම නිළධාරීන් පිරිස විශ‍්‍රාම යැවීමට රාජපක්ෂ රජය 1992 හමුදා නිළධාරීන්ගේ රෙගුලාසි පත‍්‍රය භාවිතයට ගෙන ගත්තේය.එයට අනුව හමුදා නිලධාරියෙක් කිසියම් අනිසි කි‍්‍රයාවක යෙදුනු බවට චෝදනා ලැබ හෝ ජනපතිවරයාගේ අවධානයට යොමු කෙරෙන නීති  විරෝධී හෝ රාජ්‍ය විරෝධී කටයුත්තකට හවුල්ව සිටින්නෙක් බව සදහන් වුවහොත් තම  නියමයෙන් එම නිළධාරියා විශ‍්‍රාම යැවීමට හෝ සේවයෙන් පහකිරීමේ බලතල ජනපතිට හිමිය.එල්.මෙසේ විශ‍්‍රාම යැවෙන නිළධාරීන්ට ඔවුන්ගේ විශ‍්‍රාම වැටුපද අහිමිය.1999 වසරේදී එල්.ටී.ටී.ඊ සංවිධානයට හමුදා කදවුරු කිහිපයක් අත්පත් කර ගැනීමට අවස්ථාව ලබා දෙමින් දුර්වලව යුධ මෙහෙයුම් කටයුතු සිදුකළ හමුදා නිළධාරීන් කිහිපදෙනෙකට එරෙහිවද මෙම බලතල භාවිතයට ගැණිනි.

අලූත පත්කෙරුණු මෙම නිළධාරීන්ගෙන් දස දෙනෙක්ම විදේශයන්හි සිට නැවත මෙරටට පැමිණීයේ ජනපතිවරණය අවසන්වූවායින් පසුවය.සරත් ෆොන්සේකා මහතා මැදිහත්ව ඔවුන්ට නව ජනපති සිරිසේන හමුවීමට අවස්ථාව සළසා දුන් අතර ඔවුන්ව නැවත ධූරයන්හි පිහිටුවන්නටත් ඔවුන්ට හිමි දීමනා හා වරප‍්‍රසාද ලබාදෙන්නටත්  ජනපතිවරයා අදාළ අංශ වලට නියෝග කළේය.යාපනය ආරක්ෂක සේනා අධිපති ලෙස මේජර් ජෙනරාල් නන්දන උඩවත්ත හා නැගෙනහිර අණදෙන්නා ලෙස මේජර් ජෙනරාල් ජානක වල්ගම පත්කිරීම නව පත්කිරීම් අතර තවත් ප‍්‍රධාන තනතුරු වෙනස්වීම්

දෙකකි.හමුදා බුද්ධි අංශයට සිදුකෙරෙන නව පත්කිරීම් ගැන මෙතෙක් සදහනක් නොමැත.ගෙවුනු සමයේ එක් බලඇණියක සිට බල ඇණි 7 ක් දක්වා වර්ධයව තිබෙන හමුදා බුද්ධි අංශය සම්බන්ධයෙන් ලැබී තිබෙන වාර්තාද එතරම් යහපත් නොවේ.උතුරු හා නැගෙනහිර කලාපවල ජනජීවිතයට බාධා ගෙනදෙන අයුරින් මෙහෙයුම් කටයුතුවල යෙදුණු බවට ඊට චෝදනා නැගී තිබේ.පොලිස් නිළධාරීන්ගෙන් සැදුම්ලත් රටේ ප‍්‍රධාන බුද්ධි අංශය වන සිවිල් බුද්ධි අංශයේ වගකීම් හා වැඩරාජකාරි හමුදා බුද්ධි අංශය තමන් අතට පවරාගෙන සිටි බවටද චෝදනා නැගී ඇත.පිරිස් බලය අතින්ද දැන් හමුදා බුද්ධි අංශය සිවිල් බුද්ධි අංශයට වඩා ශක්තිමත්ය.මේ සියල්ල සැලකූ විට රටේ නිල බුද්ධි සේවය වන සිවිල් බුද්ධි අංශය දැනට සිටින්නේ හමුදා බුද්ධි අංශය හමුවේ දෙවැනි තැනට වැටීය.



පොලිස්පතිගේ නියෝගය



ආරක්ෂක අංශ වල තත්ත්වය තවදුරටත් වර්ධනය කිරීම නව රජයේ අපේක්ෂාවයි.මේ සදහා ආසියා කලාපයේ මෙන්ම බටහිර රටවලද පැවැත්වෙන පුහුණු වැඩටහන් වලට ආරක්ෂක අංශ සාමාජිකයින් සහභාගී කරවීම කෙරෙහි රජයේ අවධානය යොමුව තිබේ.පොලිස් දෙපාර්තමෙන්තුවද අමතක කර නොමැති රජය ශක්තිමත් හා හොදින් සංවිධානය වූ පොලිස් සේවයක් රටේ ඇතිකිරීමේ වැදගත්කම වටහාගෙන සිටී.දේශපාලඥයින්ගේ හෝ වෙනත් බලවත් පුද්ගලයින්ගේ මැදිහත්වීකින් තොරව රටේ ජනතාවට නියමාකාරව සාධාරණය ඉටුකර ගත හැකි ස්වාධීන ආයතනයක් බවට පොලිසිය පත්කිරීම රජයේ ඉදිරි වැඩකටයුතු ලැයිස්තුවේ ඉහළින්ම තිබෙන්නකි.කෙසේවුවත් එය ලෙහෙසි පහසු කටයුත්තක් නම් නොවනු ඇත.ගෙවුනු අවුරුදු කිහිපය සැළකීමේදී පොලිසිය තරම් චෝදනා ලැබූ,අයථා ගනුදෙනු සිදුවූ,අදමිටු පාලකයින්ගේ බලයට හසුවූ වෙනත් ආයතනයක් නොමැති තරම්ය.



කාලය ගෙවී පොලිසියේ ව්‍යුහය මේ වන විට සකස්ව ඇත්තේ එහි සිටින දේශපාලන රැුකවරණය ලබන කුඩා කණ්ඩායමකට මුල් පුටුවල නිළධාරීන්ගේ නියමයටත් ඉහළින්  කටයුතු කිරීමට හා ඇතැම් අවස්ථාවල දේශපාලන බලය භාවිතා කර ඉහළ නිළධාරීන්  ගන්නා තීන්දු තීරණ බලහත්කාරයෙන් වෙනස් කිරීමේ හැකියාවද ලබාදී ඇති පරිදිය.මෙම  දේශපාලන බලපෑම් නිසා තම රාජකාරි නිසි පරිදි සිදුකරගෙන යෑමට ඉහළ නිළධාරීන්ට නොහැකි තත්ත්වයක් මතුව තිබේ.අනෙක් පසින් පොලිසියේ ඉහළ නිළධාරීන්ම තම සගයින්ට චෝදනා කරමින් සිටී.පොලිසියෙන්ම තෝරාගත් කණ්ඩායමක් තම සිතැගි පරිිදි මෙහෙයමින් සිටින බවත් එම කණ්ඩායමේ සිිටින පුද්ගලයින්ට විශේෂ සැළකිලි දක්වන බවත් කියමින් එම නිළධාරීන්ට චෝදනා නගන්නේ ඔවුන්ගේම සගයින්ය.





මේ සියල්ල සැලකූ විට පෙනෙන කරුණ වන්නේ මේවාට විසදුම් සෙවිය යුතුවන්නේ පොලිසියෙන්ම පමණක් නොවන බවය.පොලිසියේ ඇති මෙම ගැටලූවට පිළියම් යොදා  නිළධාරීන් අතර තිබෙන බල අරගල වලින් ඔවුන් වෙත සරණ පතා පැමිනෙන සාමාන්‍ය ජනතාව පීඩාවට පත්වීම වැළැක්වීම නව රජයේ වගකීමකි.එමෙන්ම දින 100 යේ සැළැස්ම කි‍්‍රයාවට නැංවීමටත් ජනතාවට දුන් පොරොන්දු ඒ ආකාරයටම කි‍්‍රයාත්මක කිරීමටත් නව රජය වගබලා ගත යුතුය.



පොලිසිය සම්බන්ධ ඉදිරි වගකීම් වලින් වැඩි කොටසක් රැුදී ඇත්තේ වත්මන් පොලිස්පති එන්.කේ ඉලංගකෝන් මහතා අත බව සත්‍යයකි.පොලිස් නිළධාරීන්ට මහජන සාමය,ආපදා කළමණාකරන හා කි‍්‍රස්තියානි කටයුතු අමාත්‍යංශය වෙත නොයන්නයැයි නොයන්නයැයි මින් පෙර අවස්ථාවකදී ලබාදී තිබුණු නියෝගයක් ඔහු මෙම මසදී අලූත්  කළේය.පසුගිය 14 වැනිදා නිකුත් කෙරුණු නවතම චක‍්‍රලේඛයේ එය සදහන්ව තිබුණේ මෙලෙසය.

මහජන සාමය,ආපදා කළමණාකරන හා කි‍්‍රස්තියානි කටයුතු අමාත්‍යංශයට විවිධ අවස්ථාවන්හිදී ඇතැම් පොලිස් නිළධාරීන් පොලිසි මූලස්ථානයේ අවසරයකින් යෑම් ඊම් කරන බවට තොරතුරු අනාවරණයව තිබේ.එසේ කිරීම එම අමාත්‍යංශයේ කටයුතු වලට හා පොලිස් මූලස්ථානයේ කටයුතු වලට මහත් බාධාවකි.

මේ සම්බන්ධයෙන් එම අමාත්‍යංශය භාර අමාත්‍යවරයාගේද අවධානය යොමුව තිබෙන අතර පොලිස්පතිවරයාගේ අවසරයක් නොමැතිව පැමිණෙන පොලිස් නිළධාරීන් හට අමාත්‍යංශට ඇතුල්වීම තහනම් කරමින් නියෝගයක් ලබාදී තිබේ.එහි යෑමට අපේක්ෂා කරන පොලිස් නිළධාරියෙකුවේනම් ඒ සදහා පොලිස්පතිවරයාගේ අවසරය ලබාගත යුතුය.

විශේෂ රැුස්වීමකට සහභාගී වන්නැයි කිසියම් පොලිස් නිළධාරියෙකුට අමාත්‍යංශයෙන්  කැදවීමක් ලැබුණහොත් එම නිළධාරියා වහාම පොලිස්පති දැනුම්වත් කිරීම සිදුකර අවශ්‍ය  අවසරය ලබාගත යුතුය.අමාත්‍යංශයේ කටයුතු නිමවීමෙන් පසු එහිදී සිදුවූයේ කුමක්දැයි සදහන් වාර්තාවක් පොලිස්පති වෙත ලබාදිය යුතුය.

පොලිස්පතිගේ මෙම නියෝග රජයේ ඇතැම් පාර්ශව වල අවධානයට යොමුව තිබේ.

පොලිසිය අයිති වෙන්නෙත් මහජන සාමය,ආපදා කළමණාකරන හා කි‍්‍රස්තියානි කටයුතු  අමාත්‍යංශයට.අමාත්‍යවරයා තමයි ඉහළින්ම සිටින්නේ.එත් පොලිස්පතිවරයාගේ මේ නියෝගය නිසා අමාත්‍යවරයාට සිදුවෙනවා පොලිස් නිළධාරියෙකු හදිසි රැුස්වීමකට වගේ කැදවා ගැනීමට වුවමනා වුවහොත් ඒකට පොලිස්පතිගේ අවසරය ලැබෙනකන් බලාගෙන ඉන්න.

යැයි මෙම තොරතුරු මාධ්‍ය වෙත ලබාදීමට අවසර නොතිබුණු රජයේ ජේ්‍යෂ්ඨ නිළධරයෙක් නම්ගම් හෙළිනොකිරීමේ පදනමේ පිහිටා පැවසීය.

අමාත්‍යංශය වෙත පොලිස් නිළධාරීන් එන්නේ උසස්වීම්,ස්ථාන මාරුවීම් වගේ පෞද්ගලික වුවමනා එපාකම් ඉදිරිපත් කරන්න නම් ඒ වගේ පුද්ගලයින් මුලින්ම  අදුනගන්න එක පොලිස්පතිගේ වැඩක්.එහෙම නැතුව මේ විදිහට පොලිසියේ ඔක්කොම සැක කරන එක වැරදියි.පොලිසිය අමාත්‍යංශය පාලනය කරන්න යනවා.මේක රජය  ඉදිරියේ සිදුකරන්න ඉන්න කටයුතු වලට බාධාවක් වෙන්න පුලූවන්. ඔහු වැඩිදුරටත් කීය.

ජනවාරි මස 8 වැනිදා පැවැත්වුනු ජනපතිවරණ ඡුන්ද විමසීමට දින කිහිපයකට ඉහතදීද මෙවන් ආන්දෝලනාත්මක තත්ත්වයක් පසුගිය රජය සමයේ ඇතිවුනි.එදවස නීතිය හා සාමය අමාත්‍යංශයේ ලේකම්ව සිටි හිටපු පොලිස්පති මහින්ද බාලසූරිය මහතාත් මෙවැනිම නියෝගයක් නිකුත් කිරීම ඊට හේතුවිය.

දූෂණයට එරෙහිව

වංචාව හා දුූෂණය පිටුදකින බව නව රජය ජනතාවට දුන් ප‍්‍රධානම පොරොන්දුව විය.පසුගිය රජය සමයේ වැරදි ගැන ජනාධිපතිවරණ වේදිකාවේ පුනපුනා පැවසුවද ජයග‍්‍රහණයෙන් පසු එම චෝදනා සම්බන්ධව සිදුකෙරෙන විභාග ගොලූබෙලි ගමනින් යමින් තිබීම රටේ ජනතාවගේ වැඩි මනාපයට හේතුවී නොමැත.රජය නැවත  නැවතත් කියන්නේ මෙම චෝදනා වංචාව හා දුූෂණය සම්බන්ධයෙන් නැගී තිබෙන හෙයින් ඒවා විභාග

කළ යුත්තේ නිසි ක‍්‍රමවේදයකට අනුව බවය.ඒ සදහ අධිකරණ කි‍්‍රයාමාර්ගයක් භාවිතා කළ යුතුයැයිද සැබෑ යහපාලනයක් දැකගත හැකිවන්නේ එවිටයැයිද රජය පවසන්නේය.නමුත් පසුගියදා නුගේගොඩදී පැවති රාජ්‍ය විරෝධී රැුලියේදී රජයේ මෙම පිළිවෙත දැඩිව විචේචනය කෙරුණි.නව රජයේ නායකයෝ ජනාධිපතිවරණ සමයේ හිටපු ජනාධිපති පුතුන්ගේ ලැම්බෝර්ගිනි මෝටර් රථ ගැනත්,පිටරටින් ගෙනආ අශ්වයින් ගැනත් කතා කීවත්,එතනෝල් මුදලාලිලා ගැන කීවත්, ජයග‍්‍රහණයෙන් මසක් ගතව තිබෙන තැන එම චෝදනා නිකන්ම පුස්සක් බවට පත්ව තිබෙන බවද,නිදහසට කරුණු ඉදිරිපත් කරමින් සිටින රජය එම චෝදනා විභාග කිරීම කර කරිමින් සිටින බවද එදින වේදිකාවේ කතාකළ කථිකයෝ කීහ.එම නැගූ චෝදනා කටට ආවක් ලෙස කිීවේද නැතිනම් පදනමක්  ඇතිව කීවේද යැයි ඔවුුහු විමසූහ.

කෙසේනමුත් දුූෂණයට එරෙහි සටනේ ඉතාම වැදගත් පියවරක් සනිටුහන් කරමින් දුූෂණ මර්දනය සදහා වන ලේකම් කාර්යාලයක් පසුගිය බ‍්‍රහස්පතින්දා බම්බලපිටියේදී පිහිටැවුනි.එහි අධ්‍යක්ෂක ලෙස පත්ව සිටින්නේ පුද්ගල පුනරුත්ථාපන,දේපළ හා  කර්මාන්ත අධිකාරියේ නියෝජ්‍ය අධ්‍යක්ෂක ආනන්ද විජේපාල මහතාය.නීතිපති කාර්යාලයෙන්,අල්ලස් හා දුූෂණ විමර්ෂණ කොමිසමෙන්,පොලිස් දෙපාර්තමෙන්තුවෙන් මෙම ලේකම් කාර්යාලයේ සේවයට විශේෂ සම්බන්ධීකාරකවරු පත්ව සිටින අතර රජයේ වෙනත් ආයතන නියෝජනය කරමින් තවත් එක් පුද්ගලයෙකුද පත්ව සිටී.මෙම පුද්ගලයින් කණ්ඩායම නියෝජ්‍ය අධ්‍යක්ෂකවරුන් ලෙස හැදින්වෙනු  ඇත.කාර්යාලයේ අනෙකුත් වැඩකටයුතු සදහා ගණකාධිවරුන් වැනි වෙනත් වෘත්තිකයින්ද බදවා ගෙන තිබේ.

දුූෂණ හා වංචා ගැන තමන්ට තිබෙන  ඕනෑම පැමිණිල්ලක් මෙම ලේකම් කාර්යාලය වෙත ඉදිරිපත් කිරීමට රටේ ජනතාවට හැකිය.කාර්යාලයේ අධ්‍යක්ෂක මණ්ඩලය එම ලැබෙන පැමිණිලි විමර්ෂණය කර ඒවා විභාග කිරීමට අදාළ ආයතනයන් වෙත එම තොරතුරු යැවීම සිදුකරනු ඇත.සෑම සති දෙකකටම වරක් එසේ තොරතුරු යැවුනු  ආයතනයන් එම තොරතුරු සම්බන්ධයෙන් පරීක්ෂණ කටයුතු සිදුකරන්නේද,එසේ සිදුවන්නේ නම් ඒවායේ ප‍්‍රගතිය කෙසේද,ආදිය ගැන ලේකම් කාර්යාලය විමසනු  ඇත.

මෙම නව යාන්ත‍්‍රණය සකස් කිරීමේ ගෞරවය හිමිවිය යුත්තේ ජනතා විමුක්ති පෙරමුණේ නායක අනුර කුමාර දිසානායක මහතා හටය.ජනපතිවරයා හා අගමැතිවරයා හා දිගටම සබදතා පවත්වාගත් ඔහු බරපතල ගණයේ නීතිවිරෝධී මුදල් ගනුදෙනු ,රජයේ මුදල් හා දේපළ අයථා ලෙස භාවිතා කළ අවස්ථා, ආදිය ගැන විමර්ෂණය කිරීමට නව ලේකම්

කාර්යාලයක් හා පොලිස් මුූලස්ථානයේ වෙනම අංශයක් පිහිටුවීමේ වැදගත්කම ඔවුන්  දෙපළට නැවත නැවතත් පෙන්වා දුන්නේය.ලේකම් කාර්යාලයේ කළමණාකරණ කටයුතු සදහා අනුයුක්ත කිරීමට රාජ්‍ය සේවයේ නියැළෙන ජේ්‍යෂ්ඨ නිළධාරීන් පිරිසක් ඔහුම මැදිහත්ව තෝරාදී ඇත.මිීට අමතරව පසුගිය පාර්ලිමෙන්තු රැුස්වීම් වලදී ඔහු නව රජයේ දුූෂණ මර්දන වැඩපිළිවෙල ගැන ඒ සෑම අවස්ථාවකදීම විමසමින් නිසි පරිදි දුූෂණ විමර්ෂණ කටයුතු සිදුකරන්නට රජය  මෙහෙයවූවේය.ඔහුගේ මේ කි‍්‍රයාන්විතය නිසා දුූෂණ චෝදනා ලැබ සිටින ඇතැම් පුද්ගලයෝ ඔහුව හමුවීමට විශේෂ දුූතයින්ව  එවමින් ඔවුන්ගේ පැත්තට කරුණු දක්වන මෙන් ඉල්ලා සිටි අවස්ථා කිහිපයක් ගැන තොරතුරුද පසුගිය දින කිහිපයේදී වාර්තා විය.ඔවුන්ට පිළිතුරු දී තිබෙන අනුර කුමාර මහතා පවසා ඇත්තේ හොදම දෙය ඔවුන්ගේ පැත්ත ගැන ඔවුන්ම රටට කීම බවය.තමන් තමන්ගේ පැත්තේ සිට කරුණු කියන බව ඔහු කියා ඇත.ජනපතිවරයා මුලසුන දැරූ  ජාතික විධායක කවුන්සිලයේ පසුගියදා පැවැති හමුවේ ප‍්‍රතිඵලයක් ලෙස මේ වන විට රනිල් වික‍්‍රමසිංහ මහතා ප‍්‍රධානීත්වය දරන දුූෂණ මර්දන කොමිසමක්ද පත්ව  සිටී.ජාතික විධායක කවුන්සිලයේ මෙන්ම මෙම නව දුූෂණ මර්දන කොමිසමේද සාමාජිකත්වය අනුර කුමාර දිසානායක මහතාට හිමිය.

කැබිනට් මණ්ඩලයට විශේෂ සංදේශයක් ඉදිරිපත් කළ අගමැති රනිල් වික‍්‍රමසිංහ මහතා දුෂණ මර්දන කමිටුවේ කාර්යභාරය පැහැදිලි කළේය.පසුගිය රජය සමයේ සිදුවනු බවට චෝදනා නැගී ඇති මහා පරිමාන දුෂණ වංචා පිළිබද සොයාබැලීමත්,එම කටයුතු  වලට හවුල්වූවන්ට එරෙහිව නීතිය කි‍්‍රයාත්මක කිරීමත්,ඉදිරියේදී එවැනි ගනුදෙනු වල නියැළීමට ඇති ඉඩ නව නීති හදුන්වාදීම මගින් අවහිර කිරීමත් කමිටුවට පැවරී තිබෙන  රාජකාරියයි.සංදේශයේ සදහන්ව තිබූ අන්දමට මේ වෙනුවෙන් පිහිටුවා තිබෙන දුෂණ මර්දන ලේකම් කාර්යාලයේ මූලික මෙහෙයුම් කටයුතු සදහා දැනට රුපියල් ලක්ෂ 75 ක මුදලක් වෙන් කර ඇත.අංක 101 ආර්.ඒ.ද මැල් මාවත කොළඹ 03  යන ලිපිනයේ පිහිටා තිබෙන මෙම කාර්යාලයට වෙත යන  ඕනෑම කෙනෙකුට වංචාවක් හෝ දුෂණයක් ගැන තොරතුරු තමන් සතුව ඇත්නම් ඒවා භාරදිය හැකිය. හෙට (23) දිනයේ සිට මෙම කාර්යාලයේ වැඩකටයුතු ඇරඹෙනු ඇති අතර ජනතාවට තම තමන්ගේ පැමිණිලි භාරදිය හැකි බවට නිල පණිවුඩයක් ඒ සමගම නිකුත් කෙරෙනු ඇත.

දුෂණ මර්දන ලේකම් කාර්යාලය හා එක්ව කටයුතු කරනු ඇති ප‍්‍රධානතම ඒකකය වනු ඇත්තේ බරපතල ගණයේ නීති විරෝධී මුදල් ගනුදෙනු,රාජ්‍ය මුදල් හා දේපළ  අයථා ලෙස භාවිතා කිරීම් ආදිය ගැන සොයාබැලීමට පත්කර සිටින විශේෂ පොලිස් ඒකකයයි.මෙම ඒකකයේ ප‍්‍රධානීයා වන්නේ නියෝජ්‍ය පොලිස්පති රවී විද්‍යාලංකාර මහතාය.වසර 35 ක අත්දැකීම් ඇති පරිණත පොලිස් නිළධාරියෙකු වන ඒ මහතා නිීතිඥවරයෙක්ද වේ.තම සේවා කාලය පුරාවට පොලිසියේ විවිධ තනතුරු

හොබවා ඇති ඔහු වරක් අපරාධ පරීක්ෂණ දෙපාර්තමෙන්තුව භාරවද කටයුතු කර ඇත.ඔහු යටතේ මෙම ඒකකයට සහයක අධ්‍යක්ෂකවරුන් 6 දෙනෙක්,ප‍්‍රධාන පොලිස් පරීක්ෂකයින් 10 දෙනෙක්,පොලිස් සාජන්වරු 20 දෙනෙක් හා පොලිස් කොස්තාපල්වරු 40 දෙනෙක් අනුයුක්ත කර සිටිති.

නමුත් මෙම ඒකකයට මේ දක්වාම මෙහෙයුම් කටයුතු ආරම්භ කිරීමට හැකිව නොමැත.එම කටයුතු ආරම්භ කිරීම සදහා නිසි ගොඩනැගිල්ලක් මේ දක්වාම  සොයාගත නොහැකිව තිබීම එයට හේතුවයි.සුදුසු ගොඩනැගිල්ලක් තෝරාගෙන දීමේ වගකීම පැවරී තිබෙන්නේ හිටපු ජනපතිනී චන්ද්‍රිකා බණ්ඩාරනායක සමයේ ආරක්ෂක ලේකම්වරයා වූ අද දිනයේ වත්මන් ජනපති මෛතී‍්‍රපාල සිරිසේන මහතාගේ උපදේශකයෙකු වන තිලකරත්න රවිරාජා හටය.

මූල්‍යමය අපරාධ විමර්ෂණ දෙපාර්තමෙන්තුව යැයි නම් කෙරී ඇති මෙම නව ඒකකයට පැවරී ඇති රාජකාරි වන්නේ,

x          බරපතල ගණයේ මූල්‍යමය අපරාධ හා දැනට කි‍්‍රයාත්මකව පවතින විසල්  සංවර්ධන ව්‍යාපෘතීන් ගැන ජනතාව ලබාදෙන තොරතුරු අනුව පරීක්ෂණ කටයුතු දියත් කිරීම.



x          රජයේ මුදල් හා දේපළ අයථා ලෙස භාවිතා කළ අවස්ථා ගැන පරීක්ෂණ කිරීම.



x          රටේ ආරක්ෂාවට,රටේ ආර්ථිකයට,රටේ සෞඛ්‍ය පද්දතියට හා පරිසරයට හානි විය හැකි ප‍්‍රතිඵල ගෙනදිය හැකිව තිබුණු අයථා මුදල් ගනුදෙනු ගැන පරීක්ෂණ කිරීම.



x          අයථා ලෙස ධනය එක්රැුස් කර  ගැනීම් හා අත්තනෝමතික ලෙස බලය භාවිතා කිරීමේ අවස්ථා ගැන පරීක්ෂණ සිදුකිරීම.



x          මුදල් ලබාදීම්,ත‍්‍රස්තවාදයට මූල්‍යමය අනුග‍්‍රහයන් ලබාදීම්,මහා පරිමානයේ අයථා මුදල් ගනුදෙනු ගැන පරීක්ෂණ සිදුකිරීම.



පසුගිය 13 වැනිදා නිකුත් කෙරුණු ගැසට් පත‍්‍රයේ පොලිස්පතිවරයා මෙම නව ඒකකය කටයුතු කරනු ඇත්තේ කෙසේද,එහි අරමුණ කුමක්ද,පරීක්ෂණ කටයුතු සිදුකිරීමට එයට ඇති නීතිමය පසුබිම හා නීතිමය අවසරය කවරේද ආදී කරුණු පැහැදිලි කර තිබුණි.

දුූෂණ මර්දන ලේකම් කාර්යාලයට ලැබුණු මුල්ම පැමිණිලි අතර ජනතා විමුක්ති පෙරමුණෙන් ලැබුණු පැමිණිල්ල ප‍්‍රධාන විය.පසුගිය රජය සමයේ 2007 වසරේදී යුක්රේනයෙන් මිලදී ගැනුනු මිග් 27 වර්ගයේ ප‍්‍රහාරක යානා සම්බන්ධ ගනුදෙනුව නීති්‍යානුකූලව සිදුව තිබේද,එම ගනුදෙනුවෙන් කවර හෝ පුද්ගලයෙකුට විශාල කොමිස්  මුදලක් හිමිව තිබේද ආදී කරුණු ගැන විමර්ෂණයක් කළ යුතුයැයි එහි සදහන් විය.ජාතික හෙළ උරුමයද පැමිණිල්ලක් ඉදිරිපත් කරමින් හිටපු ආරක්ෂක මණ්ඩල ලේකම් ගාමිණී සෙනරත් මහතා ඔහු එම ධූරය දැරූ සමයේ අත්පත් කරගත් දේපළ සම්බන්ධයෙන්  සොයාබැලිය යුතු බව කීවේය.ජාතික හෙළ උරුමය මෙම පැමිණිල්ල  මිීට පෙර අවස්ථාවක දේශීය ආදායම් දෙපාර්තමෙන්තුවටද ඉදිරිපත් කර තිබුණකි.එක්සත් ජාතික පක්ෂය ඉදිරිපත් කර තිබුණු පැමිණිල්ලේ සදහන්වූයේ හිටපු ආර්ථික සංවර්ධන අමාත්‍ය බැසිල් රාජපක්ෂ මහතා ඔහුගේ දිවි නැගුම ව්‍යාපෘතියට ලබාදුන් මුදල් භාවිතා  කර තිබෙන ආකාරය විමර්ෂණය කළ යුතු බවය.පසුගිය සතියේ පාර්ලිමෙන්තුවේදී බැසිල් රාපක්ෂ මහතාට තවත් සති 3 ක නිවාඩුවක් ලබාදීම සම්මත විය.ජනවාරිි මස 8 වැනිදා ජනාධිපතිවරණයෙන් පසු බැසිල් රාජපක්ෂ මහතා හීන්සීරුවේ ශී‍්‍රලංකාවෙන් ලිස්සා ඇමරිකාවේ ලොස් ඇන්ජලීස් නුවර තම නිවස බලා ගියේය.

නුගේගොඩ සිට නුවරට

ඉබි ගමනින් යන දුූෂණ මර්දන වැඩපිළිවෙල සම්බන්ධයෙන් සැළකිල්ලෙන් සිටියත් ජනපති සිරිසේන මහතාගේ අවධානය යොමුව තිබුණේ එයට නොවේ.පෙරේදා දිනයේ ඔහු නුවර පැවති ශී‍්‍රලංකා නිදහස් පක්ෂ මන්තී‍්‍රවරුන්ගේ වැඩමුලූවකට සහභාගීව සිටි අවස්ථාවේම කොළඹ - නුගේගොඩ ප‍්‍රදේශයේ පැවැත්වෙමින් තිබූ රාජ්‍ය විරෝධී  හමුවක් ගැන ඔහු ඒ සියල්ලට වඩා වැඩි අවධානයකින් සිටියා යැයි කීම නිවැරදිය.

ජනපතිවරයා එසේ නුවර ශී‍්‍රලංකා නිදහස් පක්ෂ පාර්ලිමෙන්තු මන්තී‍්‍රවරු අමතමින් සිටියදී එක්සත් ජනතා නිදහස් සන්ධානයේ ප‍්‍රබල සාමාජිකයින් වන දිනේෂ් ගුණවර්ධන,විමල් වීරවංස,වාසුදේව නානායක්කාර හා උදය ගම්මන්පිල නුගේගොඩ ආනන්ද සමරකෝන් එළිමහන් රංග පීඨ පරිශ‍්‍රයේ සිට ජනතාව ඇමතූහ.මෙම හමුවට  14000 ක පමණ ජනකායක් සහභාගීව සිටි බව පොලිස් වාර්තා වල සදහන්ය.එහි අරමුණ ලෙස පැවසුනේ හිටපු ජනපති මහින්ද රාජපක්ෂ මහතා ඉදිරි මැතිවරණයේදී අගමැති අපේක්ෂකයා ලෙස නම් කිරීමට ජනපතිවරයාට බල කිරීමය.මහා ජන ගගක් ගැලූ බව පැවසුනද පසු අවස්ථාවක රජය කීවේ බස් රථ 212 කින් ඔවුන්ගෙන් වැඩිහරිය  ගෙනවිත් තිබෙන බවය.මාතර,ගාල්ල,හම්බන්තොට,තංගල්ල,මොණරාගල,ගම්පහ,රත්නපුර  හා කලූතර ආදී ප‍්‍රදේශවලින් ජනතාව ගෙනවිත් තිබෙන බව රජය වැඩිදුරටත් කීවේය.

මෙවැනිම හමුවක් මහින්දානන්ද අලූත්ගමගේ හා ලොහාන් රත්වත්තේ ප‍්‍රධානත්වයෙන් නුවරදී පැවැත්වීමට කර ඇති සැළසුමක් ගැන නව රජයේ දේශපාලන නායකයින්ට තොරතුරු ලැබී තිබේ.මෙහි අරමුණ වන්නේද මහින්ද රාජපක්ෂ මහතා අගමැති අපේක්ෂක ලෙස තෝරාගත යුතුව ඇතැයි ජනපති සිරිසේන මහතාට බල කිරීමය.කෙසේවුවත් මෙම හමුවටනම් ශී‍්‍රලංකා නිදහස් පක්ෂයේ ජේ්‍යෂ්ඨ නායකයින් කිහිප දෙනෙක්ම විරෝධය පළ කර තිබෙන බව සදහන්ය.

බස්නාහිර පළාත් සභා මහඇමති ප‍්‍රසන්න රණතුංග,සාලින්ද දිසානායක,ටී.බී.ඒකනායක,කුමාර් වෙල්ගම හා මනූෂ නානායක්කාර වැන්නවුන් නුගේගොඩ හමුවට සහභාගීව සිටීමෙන් පැහැදිලිව පෙනුනු කරුණ වන්නේ වත්මන්  ජනපති සිරිසේන මහතාගේ ශී‍්‍රලංකා නිදහස් පක්ෂ නායකත්වය පිළිගැනීමට ඇතැම් ශී‍්‍රලංකා නිදහස් පාක්ෂික ප‍්‍රබලයින් තවමත් අකමැති බවය.පෙරේදා දිනයේදී මිීගමුවේ  හෝටලයකදී ශී‍්‍රලංකා නිදහස් පක්ෂයේ ප‍්‍රබලයෙකු,එම පක්ෂයට දැඩිව බැදී සිටින ආධාරකරුවන් පිරිසක් හා විශේෂ හමුවක් පවත්වා තිබීමෙන්ද මෙය තවත් පැහැදිලි  වේ.එක්සත් ජාතික පක්ෂයේ ඇතැම් පාර්ශවයන් මෙය දකින්නේ එළැඹෙන මහ මැතිවරණයේදී ඔවුන්ට වාසි සහගත වන තත්ත්වයක් ලෙසය.

නිදහස් පක්ෂය බෙදෙනවා කියන්නේ අපට හොදයි.ඔවුන් කීය.

නමුත් මේ වාසිය ලැබීම හෝ නොලැබීම තීරණය වන්නේ මැතිවරණය ඉක්මනින් පවත්වනවාද නැතහොත් කල්දමනවාද යන්න මතය.අනෙක් අතට ශී‍්‍රලංකා නිදහස් පක්ෂයේ මෙන්ම එක්සත් ජාතික පක්ෂයේද ජනපි‍්‍රයතාවය දැන් තිබෙන්නේ බහින කලාවේය.නමුත් එය පිළිගැනීමට පක්ෂ නායකයෝ අකමැතිය.

නුගේගොඩ රැලියට ආධාර සැපයූ,බස් රථ සදහා ගෙවීම් සිදුකළ,අතුරුගිරියේ මුද්‍රණාලයක මුද්‍රණය කර ඇතැයි කියන පති‍්‍රකා සදහා මුදල් වැය කළ ව්‍යාපාරිකයින් දෙදෙනෙකුගේ තොරතුරු රජය සතු බව සදහන්වේ.නුගේගොඩ පැවැත්වූ රැුස්වීමෙදී වූවාක් මෙන්  නුවර පැවැත්වීමට යන රැුස්වීමේදීද රජයට පහර ගැසීමට කථිකයෝ යොදාගනු ඇත්තේ දුුූෂණ විමර්ෂණ කටයුතු සම්බන්ධයෙන් රජය අනුගමනය කරමින් සිටින ගොලූබෙලි ප‍්‍රතිපත්තියයි.මතුවෙමින් පවතින දුූෂණ චෝදනා ගැන විමර්ෂණය කිරීමට රජයට තවමත්  නිසියාකාර යාන්ත‍්‍රණයක් සකස්කරගත නොහැකිව තිබීම මේ වන විට රටේ ජනතාව අතර මහත් ගැටලූකාරී තත්ත්වයක් ඇතිකර තිබේ.

මෙනිසාම රජයේ දින 100 යේ වැඩසටහන අනුව අප්‍රේල් මස 23 වැනිදා පාර්ලිමෙන්තුව විසිරැුවෙනු ඇත්දැයි ඇත්තේ සැකයකි.එදිනට පාර්ලිමෙන්තුව විසිරැුවෙන බව කියන්නේ එක්සත් ජාතික පක්ෂය පමණකි.ඔවුන් සමග පොදු විපක්ෂය හා අත්වැල් බැදගෙන සිටි  අනෙක් පක්ෂ එවැන්නක් දැන් පවසන්නේ නැත.ශී‍්‍රලංකා නිදහස් පක්ෂය පැත්තෙන් බැලූ විට නව විපක්ෂ නායක නිමල් සිරිපාල ද සිල්වා මහතා ප‍්‍රමුඛ නායකයින්ට තමන්ගේ ප‍්‍රතිරූපය පාක්ෂියකින් අතරට ගෙනයෑමටත්,මහින්ද රාජපක්ෂ මහතාගේ පාලන සමයේ  ඔහු හා ඔහුගේ පවුලේ සාමාජිකයින් සිදුකළ වංචා හා දුූෂණ ගැන මනා විනිවිදභාවයකින් යුතුව කරුණු ඉදිරිපත් කර තවමත් මහින්ද රාජපක්ෂ මහතාට පක්ෂපාතීත්වය දක්වන පිරිස් තමන් වෙත දිනාගැනීමටත් සිදුවේ.මෙය නව රජය දියත් කර තිබෙන දුූෂණ  විමර්ෂණ කටයුතු කඩිනමින් සිදුවන්නේ නම් ඉතාම පහසු දෙයකි.නමුත් එම කටයුතු දිනෙන් දිනම ප‍්‍රමාද වෙමින් පවතී.මෙනිසා තම නායකත්වය හා පක්ෂය අනතුරේ හෙළන මැතිවරණයකට යෑමට නිමල් සිරිපාලද සිල්වා මහතා එකගතාවය පළකරතියි සිතිය නොහැක.පාර්ලිමෙන්තුව මෙසේ ගිනියම් වෙද්දී අනෙක් පසින් මහින්ද රාජපක්ෂ මහතා  නැවත බලයට ගෙන ඒමේ වැඩපිළිවෙලක්ද කි‍්‍රයාත්මකය.මේ සියල්ලට විසදුම් ලබාදීමට පරීක්ෂණ කටයුතු කි‍්‍රයාත්මක වීම ඉතාම වැදගත්වුවත් ඒවායේ ප‍්‍රතිඵල ලැබෙන්නට තවත් කල්ගත වන බව පෙනෙන නිසා මැතිවරණය පැවැත්වීම කල්යෑමේ විශාල හැකියාවක් ඇත.පාර්ලිමෙන්තුව විසිරුවන බව කියන එක්සත් ජාතික පක්ෂයට ඉදිරියේදී තමන්ගේ  ප‍්‍රකාශ ගැන වඩාත් සැළකිලිමත්වීමට සිදුවනු ඇත.පාර්ලිමෙන්තුව විසිරැුවීමේ අවසන් තීරණය තිබෙන්නේ ජනපතිවරයා අත වුවත් පාර්ලිමෙන්තුවේ බහුතර බලය තිබෙන්නේ ශී‍්‍රලංකා නිදහස් පක්ෂයටය.මෙනිසා පරීක්ෂණ කටයුතු නිසි පරිදි සම්පූර්ණ කර තමන්ගේ පැවැත්ම රැුකගැනීමට අවස්ථාවක් නොදෙන වාතාවරණයක එක්සත් ජාතික පක්ෂය පාර්ලිමෙන්තුව අපේ‍්‍රල් 24 වැනිදා විසිරවෙනවායැයි කීම හමුවේ තමන්ගේ ආරක්ෂාව  වෙනුවෙන් බහුතර බලය හිමි ශී‍්‍රලංකා නිදහස් පක්ෂය එක්සත් ජාතික පක්ෂ රජය පෙරළා දමා තමන්ගේ රජයක් ස්ථාපිත කර ගැනීමට කටයුතු නොකරනු ඇතැයි කිසිවෙකුටත් කිව නොහැකිය.

පාර්ලිමෙන්තුව අපේ‍්‍රල් මස 24 වැනිදා විසිරුවා නොහැරිය යුතු බව කියන ප‍්‍රධාන පුද්ගලයෙකු වන්නේ රජයේ ප‍්‍රධාන හවුල්කරුවෙකු වන සමාජ සාධාරණත්වය සදහා වන ජාතික ව්‍යාපාරයේ කැදවුම්කරු පූජ්‍ය මාදුළුවාවේ සොභිත හිමියන්ය.

අප ජනපති මෛතී‍්‍රපාල සිරිසේන මහතා එක්ක අවබෝධතා ගිවිසුමක් අත්සන් කළේ එකගතා 3 ක් මුල් කරගෙන.පළමුවැන්න ජනාධිපතිවරයාගේ විධායක බලතල සංශෝධනය කිරීම.දෙවැන්න 17 වැනි ව්‍යවස්ථා සශෝධනය කි‍්‍රයාවට නැංවීම.තෙවැන්න ඉදිරි ඡුන්ද විමසීම් සිදුවිය යුතු ආකාරය පිළිඹද අවශ්‍ය සංශෝධන සිදුකිරීම.පළමුවැන්න හා දෙවැන්න කි‍්‍රයාවට නැංවීම සම්බන්ධයෙන් කිසිම ගැටලූවක් නැහැ.නමුත්තුන්වැන්න,ඒ කියන්නේ ඡුන්ද විමසීම් වලට සංශෝධන සිදුකළ යුතුය කියන එක කි‍්‍රයාවට නංවන්න රජයේ මේ දින 100 වැඩපිළිවෙලේදී බැහැ කියලයි අපේ මතය.ඒකට කාලය අවශ්‍යයි.මේ නිසා රජයට දින 100 කම එල්බගෙන සිටීමට අවශ්‍යතාවක් නැහැ.ඉදිරිපත් කරලා තියෙන යෝජනා කි‍්‍රයාත්මක කරන්න මාස 6 ක් වගේ තිබුණානම් ප‍්‍රමාණවත්.

රජයේ දින සියයේ වැඩපිළිවෙලේ දැනට තියෙන ඡුන්ද ක‍්‍රමය වෙනස් කරනවා කියලා පොරොන්දුවක් දීලා තියෙන්නේ.නමුත් මේ යන විදිහට එම පොරොන්දුව ඉටු කරගන්න පුලූවන් වෙන බවක් පෙනෙන්නට නැහැ.ඒක කරගන්න බැරිව දින 100 ට අනුව අපේ‍්‍රල්  මාසෙ 24 පාර්ලිමෙන්තුව විසිරුවා හැරියොත් ජනතාවට ආයෙමත් සිදුවෙන්නේ සමානුපාතික ඡුන්ද ක‍්‍රමයෙන් නියෝජිතයින් තෝරලා පාර්ලිමෙන්තුවට එවන්න.ඒක ජනතාවට කරන අසාධාරණයක්.ඒක නිසා අවශ්‍ය වෙනස්කම් හරියට කරන්න රජය තවත් කල් ගන්න  ඕනේ.මාස 6 ක වගේ කාලයක් එයට ප‍්‍රමාණවත් වේවි.ඒ නිසයි අප කියන්නේ අප්‍රෙල් මාසේ පාර්ලිමෙන්තුව විසිරුවනවායැයි කීමේ තේරුමක් නැහැ කියලා. යැයි පවසන්නේ රජයේ ප‍්‍රධාන පාර්ශවයක් වන ජාතික හෙළ උරුමයයි.උරුමයයි.

සමබර විදේශ සබදතා

ජනපති මෛතී‍්‍රපාල සිරිසේන මහතාට විශේෂයෙන් සැළකිලිමත්වීමට සිදුව තිබෙන තවත් කාරණයක් වන්නේ ශී‍්‍රලංකාවේ වත්මන් විදේශ සබදතාය.විශේෂයෙන් චීනය හා ඉන්දියාව අතර සබදතා සමබරව පවත්වාගැනීම ඔහු හමුවේ ඇති අභියෝගයයි.ජනපතිවරයා

එළැඹෙන මාර්තු මස 26 වැනිදා සිව්දින නිල සංචාරයක් සදහා චීනය බලා යෑමට නියමිතය.ඉන් අනතුරුව ඔහු පකිස්තාන නිල සංචාරයක් සදහා බීජිං නුවර සිට පකිස්තානයේ ඉල්ලාමාබාද් බලා යනු ඇත.ජනපතිවරයාගේ සැළසුම  වන්නේ මාර්තු මස 30 වැනිදා සිට පකිස්තාන සංචාරය ආරම්භ කිරීමටය.මේ අතරවාරයේ ඉන්දියා ජනපති නරේන්ද්‍ර මෝදි තෙදින නිල සංචාරයක් සදහා එළැඹෙන 13 වැනිදා දිවයිනට පැමිණෙනු ඇත.ඔහු නුවර හා යාපනය ප‍්‍රදේශවල සංචාරයේ යෙදීමටද නියමිතය.විදේශ අමාත්‍ය මංගල සමරවීර මහතා සිකුරාදා (27) බීජිං බලා පිටත්වනු ඇත.

බලයට පත්ව සති 6 ක් ගතව තිබෙන තැන නව රජය හමුවේ බරපතල අභියෝග රැුසක් පැන නැගී ඇත.ගෙවීමට තිබෙන ඉදිරි සති කිහිපයේදී එම අභියෝග ජයගෙන,ජනතාව අතර කඩාවැටෙමින් තිබෙන තම ප‍්‍රතිරූපය ගොඩනංවාගෙන ඉදිරියට යෑමට රජය කෙසේ කටයුතු කරනු ඇත්දැයි යන්න සැබෑවටම ගැටලූවකි.රටේ ආරක්ෂාව ගැනද නැවත වරක් සිතාබැලිය යුතු අවස්ථා ඇතිවෙමින් තිබෙන හෙයින් ඒ ගැනද රජය සැළකිලිමත් විය යුතුව ඇත.

ලංකාදීප 2015 පෙබරවාරි මස 22

Sunday, February 22, 2015

Written on

විමල්ගේ බිරිඳ අත්අඩංගුවට

හිටපු අමාත්‍ය විමල් වීරවංශ මහතාගේ බිරිද වන ශෂී වීරවංශ මහත්මිය අපරාධ පරීක්‍ෂණ දෙපාර්තමේන්තුව විසින් අත්අඩංගුවට ගෙන තිබෙනවා. ඒ කොළඹ පෞද්ගලික රෝහලක ප‍්‍රතිකාර ලබමින් සිටියදීයි. ව්‍යජ නම් සහ උපන්දින ඇතුළත් කර සාමාන්‍ය හා රාජ්‍ය තාන්ත්‍රික ගමන් බලපත්‍ර දෙකක්  සකස් කිරීම ඇයට එරෙහි චෝදනාවයි .
මාලබේ පෞද්ගලික රෝහලක ප්‍රතිකාර කරන බවට ලද තොරතුරකට අනුව එහි ගිය විශේෂ රහස් පොලිස් කණ්ඩායමක් ඇය අත්අඩංගුවට ගත් බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී අජිත් රෝහණ මහතා පවසයි.
ඇය සඳුදා (22) අධිකරණයට ඉදිරිපත් කිරීමට නියමිතය.
Written on

විමල්ගේ බිරිඳ රෝහලේ

ව්‍යාජ ගමන් බලපත‍්‍ර සකස් කර ළඟ තබාගැනීම සම්බන්ධයෙන් චෝදනා ලබා සිටින පාර්ලිමේන්තු මන්ත‍්‍රී විමල් වීරවංශ මහතාගේ බිරිඳ වන ශෂී වීරවංශ මහත්මිය සිය නිවසින් පලාගොස් ඇතැයි පුවත්පත් කිහිපයක් අද වාර්තා කර තිබෙනවා. එම වාර්තාවල වැඩිදුරටත් දැක්වෙන්නේ වීරවංශ මහත්මියගෙන් ප‍්‍රශ්න කිරීම සඳහා අපරාධ පරීක්ෂණ දෙපාර්තමේන්තුව ඇගේ නිවසට යන විට ඇය එහි රැඳී සිට නොමැති බවයි.

මේ සම්බන්ධයෙන් විමල් වීරවංශ මන්ත‍්‍රීවරයා කියා සිටියේ සිය බිරිඳ අසනීප තත්ත්වයක් හේතුවෙන් මේ වන විට රෝහල්ගතව සිටින බවයි.

නුගේගොඩ රැලිය අවසන් වෙලා මම නිවස වෙත යනවිට බත්තරමුල්ලේ අපේ නිවස හා කාර්යාලය වෙත පොලිසියෙන් ඇවිල්ලා තිබුනා. ඒ ගොල්ලෝ දැනුම් දීලා තිබුනා 19 වෙනිදා 11ට මගේ බිරිඳට රහස් පොලිසියට එන්න කියලා. ඒවනවිට අසනීප තත්වයෙන් හිටපු නිසා අපි වෛද්‍ය වාර්තාවක් නීතිඥයෙකු මාර්ගයෙන් යොමුකරා. ඒ අය පිලිගත්තා. ඒ අනුව ඉදිරි දිනයක ඇවිල්ලා කට උත්තරයක් දෙන ලෙස  පැවසුවා.

ඇත්ත වශයෙන්ම ඒ රෝගී තත්වය උත්සන්න වීම නිසා මගේ බිරිඳ ඉන්නේ රෝහල් ගතවෙලා.  ඒ බව අපි රහස් පොලිසියට දැනුම් දුන්නා. ඒ වගේම ඔවුන්ට අපි දැන්වුවා අවශ්‍යනම් , හදිස්සි නම්  රෝහලට ඇවිල්ලා ඒ ප්‍රකාශය ගන්න කියලා. ඒක ඉතින් ඔවුන් කැමතිනම් කළ යුතුව තිබෙන දෙයක්. අපි ඒවගේම කියලා තියෙනවා එහෙම බැරිනම් සුව අතට පත්වුණාම ඒ කට උත්තරය දෙන්නම් කියලා.

මේ අතර ශෂී වීරවංශ මහත්මිය සම්බන්ධයෙන් විමර්ශන බොහෝ දුරට අවසන් කර ඇතැයි පොලිසිය පවසනවා. කෙසේවෙතත් විමර්ශන සම්පූර්ණයෙන් අවසන් වන තෙක් ඇතැම් කරුණු හෙළි කළ නොහැකි බවයි පොලිස් ප‍්‍රකාශක ජ්‍යෙෂ්ඨ පොලිස් අධිකාරී අජිත් රෝහණ මහතා පැවසුවේ

Friday, February 20, 2015

Written on

නව යුද හමුදාපති පත්කෙරේ

ශ‍්‍රී ලංකාවේ 21 වන යුද හමුදාපතිවරයා ලෙස මේජර් ජෙනරාල් කි‍්‍රෂාන්ත ද සිල්වා මහතා පත්කර තිබෙනවා. ලබන 22 වැනිදා සිට ක‍්‍රියාත්මක වන පරිදි ජනාධිපති මෛත‍්‍රිපාල සිරිසේන මහතා විසින් මෙම පත්කිරීම සිදුකර ඇති බවයි ජනාධිපති කාර්යාලය පැවසුවේ. යුද හමුදාපති ධූරයේ වැඩභාරගැනීමත් සමග ක‍්‍රිෂාන්ත ද සිල්වා මහතා ලූතිතන් ජෙනරාල් නිලයට උසස් වීමද සිදුවනවා.

ශ‍්‍රී ලංකාවේ යුද හමුදාපතිවරයා ලෙස දැනට කටයුතු කරන්නේ ලූතිතන් ජෙනරාල් දයා රත්නායක මහතායි. ඔහුගේ සේවා කාලය හෙටින් අවසන් වනවා.

යුද හමුදාවේ වසර 36ක සේවා කාලයක් සම්පූර්ණ කර ඇති මේජර් ජෙනරාල් ක‍්‍රිෂාන්ත ද සිල්වා මහතා  2013 වසරේ අගෝස්තු මාසයේ සිට 2014 වසරේ මැයි මාසය දක්වා යුද හමුදාවේ මාණ්ඩලික ප‍්‍රධානියා ලෙසද කටයුතු කළා.

කොළඹ රාජකීය විද්‍යාලයේ ආදි ශිෂ්‍යයෙකු වන ඔහු යුද හමුදාවේ ස්වෙච්ඡා බලසේනාවේ සේනාධිනායක ලෙස ද කටයුතු කළ අයෙක්. 

Thursday, February 19, 2015

Written on

වෙලේසුදා අධිකරණයට

මහා පරිමාණයෙන් මෙරටට මත්කුඩු ගෙන්වීමේ චෝදනා මත අත්අඩංගුවට ගෙන සිටින වෙලේසුදා මාර්තු මස 23 වෙනිදා දක්වා රැඳවුම් නියෝග මත ප‍්‍රශ්න කිරීමට කොළඹ මහාධිකරණය අපරාධ පරීක්ෂණ දෙපාර්තමේන්තුවට අද අවසර ලබාදුන්නා.

කොළඹ මහේස්ත‍්‍රාත් දේවිකා දි ලිවේරා තෙන්නකෝන් මහත්මිය මෙම නියෝගය ලබාදුන්නේ මත්ද්‍රව්‍ය ජාවාරම් සිදුකිරීම ඇතුළු චෝදනා 58ක් යටතේ ඔහුට එරෙහිව ගොනුකර ඇති නඩුව අද යළි විභාගයට ගත් අවස්ථාවේදියි.

වෙලේසුදාගේ බිරිඳ සහ තවත් සැකකාරියක් ද අද අධිකරණය හමුවට ඉදිරිපත් කෙරුණා. එම සැකකරුවන්ගෙන් ද මාර්තු 23 වෙනිදා දක්වා රැඳවුම් නියෝග මත ප‍්‍රශ්න කිරීමට මෙහිදී නියෝග කෙරුණා.

වෙලේසුදා අධිකරණයට රැගෙන ආවේ දැඩි ආරක්ෂක රැකවල් මැදයි. නඩුව විභාගයට ගැනුණු අධිකරණ සංකීර්ණයට පැමිණි පුද්ගලයින් විශේෂ පරීක්ෂාවකට ලක්කළ බවද වාර්තාකරු පැවසුවා. 

Wednesday, February 18, 2015

Written on

දේශපාලනයෙන් ඥාති සංග්‍රහ එපා

මැතිවරණ ක‍්‍රමය සංශෝධනය කිරීමෙන් පසුව පමණක් මහමැතිවරණය පවත්වන ලෙස සාධාරණ සමාජයක්
සඳහා ජාතික ව්‍යාපාරය රජයෙන් ඉල්ලා සිටිනවා. එහි සභාපති පූජ්‍ය මාදුළුවාවේ සෝභිත හිමියන් පෙන්වා දෙන්නේ දින සියයේ වැඩපිළිවෙළ යටතේ එය කි‍්‍රයාත්මක කළ නොහැක්කේ නම් තවත් කාලයක් ගැනීම සම්බන්ධයෙන් කිසිවෙකුගෙන් බාධාවක් නොවන බවයි. කොළඹ අද පැවැත් වූ මාධ්‍ය හමුවකදී උන්වහන්සේ මේ බව කියා සිටියා.

දිනේෂ් ගුණවර්ධන මැතිතුමාගේ කමිටු වාර්තාව තියෙනවා. ඒකේ තව සංශෝධන කිහිපයක් කරන්න වෙයි. කියන්න ලෑස්ති වෙන්නේ මේක කරන්න කල් මදි. අහවල් දවසේ කියලා අපි කවුරුත් ඉල්ලුවද?දෙයියනේ 36 අවුරුද්දක් ඉන්න පුළුවන් අපිට අල බහිනකන්. තැම්බෙනකන් ඉන්න බැරිද. ඉතින් ඕනනම් අවුරුදු 2ක්ම ගන්න.

ලබන අවුරුද්දේ අප්‍රේල් වෙනකන් පාර්ලිමේන්තුවට කල් තියෙනවා. ඒ නිසා අපිට හදිස්සියක් නැහැ. අපිට හදිස්සි නව මැතිවරණ ක්‍රමයක් යටතේ මැතිවරණයක් පවත්ත ගන්න. ඒ නිසා අපි දැඩිසේ සාධාරණ සමාජයක් උදෙසා වූ ව්‍යාපාරය තුල දිගටම ගෙනා අරගලය මේකයි.

දූෂිතයන්ට හා වංචාකරුවන්ට එරෙහි කි‍්‍රයාමාර්ග කඩිනම් කරන ලෙස ද මෙහිදී ඉල්ලීමක් කෙරුණා. වත්මන් ආණ්ඩුව යටතේ ඥාති මිත‍්‍ර සංග‍්‍රහ නොකරන ලෙස ද පූජ්‍ය මාදුළුවාවේ සෝභිත හිමියන් ඉල්ලා සිටියා.

මේවා ප්‍රමාද කරන්න එපා. ප්‍රමාද කරනකොට කුඩු වාෂ්ප වෙන්න පුළුවන්, ෆයිල් අතුරුදහන් වෙන්න පුළුවන්. මිනිස්සුත් අතුරුදහන් වෙලා බහුතරයක් දැන්. ඒ නිසා ෆයිල් ටිකත් අතුරුදහන් වේවි. අන්තිමට ඔක්කොම පුස්සක් වේවි. ඒ නිසා ඒවා පුහු කරන්න එපා. ඒක නිසා ඒවා ප්‍රමාද නොකර කරන්න කියලා අපි රජයට බලකරලා කියනවා. ඒ වගේම අපි ඉල්ලුවේ දේශපාලනකරණයෙන් තොරව මේ රටේ පාලනය වෙන්න ඕන කියලා. ඒ නිසා පටන් ගන්න එපා ඥාති සංග්‍රහ. යාළුවන්ට කරන සංග්‍රහ වෙනම කරගන්න ගෙදර ගිහින්. ඥාතීන්ට කරන සංග්‍රහ වෙනම කරගන්න. මෙතැනදී සුදුස්සාට තැන දෙන්න. මොන පක්ෂේ උනත් අපට කමක් නැහැ. ඒ නිසා අපිත් අවදියෙන් ඉන්න ඕන, ජනතාවත් අවදියෙන් ඉන්න ඕන. වැරදි පාරක යනවා නම් හරි පාර පෙන්වා දෙන්න ඕන. නිදි නම් අවදි කරවන්න ඕන.
Written on

නුගේගොඩ රැළියට ශ්‍රීලනිපයේ ප්‍රබලයින් කිහිපදෙනක් ?

“මහින්ද සමග රට දිනවීමට ඔබ සුදානම් ද?” යන මැයෙන් අද නුගේගොඩදී පැවැත්වීමට නියමිත රැළිය සඳහා ශ්‍රී ලංකා නිදහස් පක්‍ෂයේ ප්‍රබලයින් ද සහභාගි වනු ඇතැයි වාර්තාවනවා.

බස්නාහිර පළාත් ප්‍රධාන අමාත්‍ය ප්‍රසන්න රණතුංග මහතා ඊයේ කියා සිටියේ තමා රැළියට සහභාගි වීමට මුල සිටම තීරණය කර තිබු බවයි. ඊයේ රාත්‍රීයේ පොළොන්නරු දිස්ත්‍රික් පාර්ලිමේන්තු මන්ත්‍රී රොෂාන් රණසිංහ මහතා කියා සිටියේ කෙනෙකු අද පැවැත්වෙන රැළියට සහභාගි වනවා නම් එය නතර කිරීමට හැකියාවක් නොමැති බවයි.

එය ප්‍රජාතන්ත්‍රවාදී අයිතියක් බවද ඔහු පැවසුවා. අද පස්වරු 03.00ට නුගේගොඩ ආනන්ද සමරකෝන් එළිමහන් පීඨයේ දී රැළිය පැවැත්වීමට නියමිතයි. හිටපු අමාත්‍යවරුන් වන දිනේෂ් ගුණවර්ධන, විමල් වීරවංශ, වාසුදේව නානායක්කාර සහ උදය ගම්මන්පිල යන මහත්වරුන් මෙම රැළිය සංවිධාන කර තිබෙනවා.